21 tot 25 SEP 06 – TRANSVAAL


Ja, ek is terug in die Transvaal – moet sê, ek het al begin verlang na hierdie deel van ons ongelooflike mooi land. Ek is Donderdag daar by Golden Gate weg so met die pad langs deur Kestell, Warden, Vrede en toe deur Standerton na Charl Cilliers toe, om so na middagete op Van Tondershoek in te sleep.

As julle wil weet wat is lekker – lekker is om daar by Van Tondershoek se laning dennebome in te draai en die plaashek voor mens te sien.

Die Noord – Oos Vrystaat hier bo Kestell se wêreld is diep – mooi. Sulke lank sagte heuwels met die rooigras wat na die vorige goeie somer nog dig en vaal oor die vlaktes lê. Dis of die lug hier en in die Suid – Oos Transvaal blouer as blou is en so naby voel. So asof mens kan uitreik en dit aanraak – en daar is asem, asem so wyd soos die vlaktes rondom jou.

Het net vinnig in Kestell stilgehou en so deur die enkel straat een kant in en die ander kant uit gewees. Dit is ‘n stil – baie stil – dorpie daardie. Lê egter in so ‘n mooi deel van die land en so naby aan Golden Gate, dat ek ‘n gedagte het dat daardie dorpie nog baie moontlikhede het. Is nie te naby aan die stad en nie te vêr nie – wonder of die grondinflasiegogga daai plekkie ook al gebyt het.

Warden is een van daai plekke wat mens nie by indraai nie – jy gebruik hom net as ‘n merk langs die pad om te weet hoe vêr is dit nog Johannesburg of Durban toe. Het nie tyd gemaak om Vrede deur te ry nie – het in lankal se dae toe ek so tussen Bloemfontein en die plaas geryloop het, te veel daar deurgegaan en ‘n geleentheid gesoek. Het ‘n paar koue nagte daar deurgegaan!

Standerton lyk of hy in die laaste paar jaar eers begin ontwikkel het. Is seker maar ‘n ‘late bloomer’! Is ‘n lekker groot plattelandse dorp – so een wat nog dorp is, maar alles is hier. As ek so deur die paaie heen terugdink, is dit die eerste groot dorp na Outshoorn wat ek gekry het. Al die ander is maar half aan die klein kant – ingesluit Graaff Reinet.

Die Skerpioen en die karavaantjie het sommer so half vanself die pad gevat toe ek daar noord uit Standerton die pad vat Charl Cilliers toe – en dadelik was ek terug in die verkeer – het al vergeet hoe maak die Transvaal se verkeer. En die lorries! Toe kom Charl Cilliers van voor af – kannie glo hoe het die plek verander in die laaste 2 maande nie – is nog steeds net die kerk, polisiestasie (erg gehawend en opgebruik), twee algemene handelaars en ‘n kafee (sweer is nog dieselfde ouens van twee maande terug daar by die kroegtoonbank), maar die sinkhuisies en teenswoordige bevoordeeldes het die wêreld ingeneem. Van ‘n plekkie langs die pad het die dorpie opgeskiet in ‘n jong Sowetotjie. Waarlik ‘n teenswoordige bevoorregde dorp!

Die plaas was lekker – mens se ouerhuis bly seker die lekkerste plek wat daar is – van die ruik van die politoer op die plankvloere, die lang donker gang en die koel kamers, tot die lekker gekookte kos en Pa en Ma se omgee. Alles voel so asof jy gister hier uitgery het, nie asof jy na 10800 km en 9 weke later van die land deurkruis, hier ingesleep het nie.

O ja, en Vrydag toe het ek en my se pa die pad terug gevat Standerton toe en uiteindelik is die karavaan toe gerigestreer – sommer ‘n Mpumalanga nommer! Ek vat toe ‘n kans en vra of ek nie my Skerpioen ook maar kan herregistreer nie – daardie GP nommerplate doen dit nie vir my nie! En sien daar – 5 minute later is ek getransformeer van ‘n Gautenger na Mpumalanga! Ek is nogal heel in my skik met die MP nommers!

Het gekuier hier op die plaas tot vandag – gaan moreoggend vroeg terug Pretoria toe.

Dankie vir almal wat ek so met die reis ontmoet het - dankie vir almal wat die blog gelees het en dit geniet het en die kommetaar daaroor. Baie dankie vir beulah se mense en julle invloed in my lewe en laastens, maar die belangrikste - dankie aan Jesus Christus wat my Verlosser is en wat ek maar eers op hierdie reis vir die eerste keer werklik ontmoet het. Ek het nou 'n lang en vol reis vorentoe saam met Hom.

Mooi Loop

15 tot 20 Sep 06 - GOLDEN GATE en CLARENS

Is vanaand my laaste aand in hierdie deel van die land wat mens nie rêrig in woorde kan beskryf nie – ek het probeer om dit te doen in fotos, maar kon ook nie daarin slaag om die grootsheid, die ademloosheid vas te vang nie.

Ek het elke dag in ‘n ander rigting gery om ander plekke in die omgewing te bekyk en het geskuif na die karavaanpark in Golden Gate self – mooi en naby alles. Is nie so mooi soos in Meiringskloof nie, maar is lekker en nogal heel besig.

Jammer my vorige briewe en fotos het so lank gevat om op die net te kom – selfoonkoms hier is bloot ‘n gedagte!

Ek het Arno en Beatrix in die hande gekry en het dus sommer eerstehandse ‘’local’’ begeleiding gehad. Leer toe ook sommer dat Clarens, wat vernoem is na die dorpie in Switzerland waar Pres Kruger heen is met die Anglo – Boere oorlog, in die selfde jaar gestig is as wat die Titanic te water gelaat en ook gesink het. Well, Clarens staan nog - om die waarheid te sê, die enigste ooreenkoms met die Titanic is die groot sandsteenformasie net buite die dorp wat Titanic gedoop is en die sneeu wat hulle jaarliks in die omgewing beleef. Clarens is ‘n baie besonderse dorp en totaal verskillend as enige ander plek wat ek deur die Karoo of erens in die Vrystaat gesien het. Herinner my baie aan Knysna. Totaal ingerig en georienteer tov kuns en toerisme met geen van die gewone Spar, Wimpy of sulke aardse kettingwinkels nie. Dat dit werk, is ooglopend – oor die naweek was die dorp (en hy is nie baie groot nie) kant en wal van mense van oraloor – Bethlehem, Bloemfontein, Gauteng, toeriste by die busvol en almal het deur die kunsgallerye en peperduur winkeltjies geloop en koop en die letterlik tientalle restaurantjies en koffiekroegies volgepak. Die dorpie is nie baie groot nie, maar hier is blykbaar oor ‘n honderd gastehuise. Daar is redelik uitbreiding – maar is eintlik reeds op sy grense. Die plekke wat oop is, is reeds uitgekoop en ontwikkeling is reeds aan die gang. Hulle gaan ‘n groot gholflandgoed bou wat deel is van die dorpie en daar is rumours dat ‘n Biljoeners ontwikkeling met ‘n gholfbaan wat deur Garry Player ontwerp is, hier tussen Clarens en Fouriesburg gaan ontwikkel. Sal help vir die ekonomie in die omgewing, maar ek is bevrees, niks vir die mooiheid van die area nie! Ons het Sondag daar by die oudste hotel in Clarens, Maluti Mountain Lodge – sit so op die uitgang daar na Bethlehem gaan eet – ek dink jy moet omtrent ‘n local wees om te weet van daardie buffét – dit was vingerleklekker!
Sommer ook deurgery daar na waar die Tonnel vanaf die Katzedam uitmond in die As Rivier. Daarvandaan loop dit af na Bethelehem om dan later met die Wilge en die Vaalrivier langs in die Vaaldam te beland. Daai tonnel is 40 km lank!! En so groot dat jy hom met ‘n voertuig – bakkie – inspekteer (hulle maak gelukkig eers die water toe!). Tog wonderlik hoe vooruitsiendheid werk – daardie totale projek is 15 – 20 jaar of langer terug begin met die oog daarop dat die Rand eendag gaan sukkel met water en dat hierdie die Rand se water sal aanvul. Dan wonder ek by myself hoe ernstig ons huidige regering besig is met projekte – of ry ons nog steeds op die rug van die beplanning, vooruitsiendheid en briljansie van die sogenaamde ‘’apartheidsregering’’?

Die omgewing rondom die Golden Gate is baie interresant. Daar is enigiets van
‘n regte Camelot kasteel op die dorp – is nou ‘n gastehuis – tot ‘n regte Rapoensel/Goue Lokkies Kasteel, kompleet met goue haarvlegsel wat by die toring uithang. Peperduur albei, maar nogtans! Kreatief se Moses! Verder is die omgewing deurspek met vakansie plase, 4x4 roetes, trips met squats, perde ritte in die berge, wandelpaaie en voetslaanpaaie en weet nie wat nog nie. En hulle is besig! O ja, ek het geleer – die verskil tussen ‘n wandelpad en voetslaanroete is blykbaar die afstand en die moeilikgeit! Ek doen bevoorbeeld wandelpaaie met my rugbybroek, T shirt en plakkies en die ouens wat vir dae die berge vat met die nuutste skeppings van die Outdoor World en diesulke winkels, is op voetslaanroetes.

Golden Gate self is moelik om te beskryf. Om elke draai en in elke rigting is daar iets pragtig. Dit wissel ook met die stand van die son – dan belig die son diè kant van die rotsformasies, en vanmiddag lyk dit weer heeltemal anders. Hierdie geel en rooi sandsteengebergtes is regtig indrukwekkend – mens kan sommer so stil daar by een van die uitkykpunte sit en dan praat jy lank en diep met God daar in Sy huis. Daai plekke voel vir my soos kerk, ons as mense kan bou en kreatief wees soos ons wil, maar naby kom aan die geringste van een van daai rotsformasies in Sy skepping – nooit nie! ‘n Deel van die berg het afgebrand, maar gelukkig het die reën en die sneeu wat hul vroeër gehad het, meeste van die gedeeltes laat groen word. Groot dele het so ‘n groen skynsel wat nogal mooi kontrasteer met die vaalwit gras van die res. In die aand verlig hulle die Brandwag – dis ‘n punt van die berg wat so uitstaan, het spesiaal nou die aand dit loop afneem. Het vanoggend een van die wandelpaaie soontoe geneem om daar bo-op te loop klim – was nogal ‘n stywe entjie se klim. Kry toe daarbo so ‘n troppie skoolkinders van een of ander skool in die omgewing – die natuurbewaarders neem omtrent elke dag so groep hier in die berg op. het ‘n ruk sit en luister – het ook bietjie natuurwetenskap of wat hulle dit ookal deesdae noem, geleer.

Die anderdag opgery daar met ‘n paadjie na ‘n plek wat hulle die Highlands Mountain Retreat noem. Wens ek kan julle almal soontoe neem – ek het in my lewe nie so ‘n natuurtoneel gesien nie. Jou asem raak sommer so op van die grootheid. Dit is amper bo-op daardie berge – alles lê sommer so wyd en stil onder jou daar na die noorde toe. Kan sommer so ‘n hele dag daar sit en staar sonder een enkele gedagte in jou kop.

Het die ander dag ook redelik wild - veral heelwat Elande en Zebras – gesien, toe ek daai Oribi sirkel en die Blesbok sirkel gaan ry het. Ongelukkig het ek die etenstyd by die Aasvoël restaurant gemis – net die hope kaal karkasse gekry!

Maar dit is genoeg – julle sal self moet kom en oorbly – nie net deurry nie! Ek gaan vanaand vir oulaas daar op Clarens ‘n T been geniet – daar by die ‘’the Post’’. Moreoggend vroeg vat ek die pad hier op na die Transvaal – sien al uit daarna. Verlang my se familie.
Mooi Loop.

14 Sep 06 – FOURIESBURG

Hier is ek op, of moet ek se, naby Fouriesburg. So 2 of 3 km buite Fouriesburg in die mooiste kloof - Meiringskloof. Dink ek gaan hier bly vir 'n paar dae en die wereld hierrond platry van hier af. Die selfoonopvangs is egter beroerd, is bietjie diep daar in die aarde in – moet ‘n ent gaan ry as ek goed soos hierdie op die internet wil sit – bly net uitskop daar in die kloof.

Vanoggend toe die sonnetjie sy kop hier oor die omringende rante stoot, toe pak ek my rugsakkie, sit ‘n bottel koeldrank in, en vat die pad die kloof in. Hier is optrent 5 wandelpaaie by die kampeerterrein – almal redelik kort em eem of twee so 3 na 4 ure lank. Daar is blykbaar een van 5 dae – sal nou nie vir hom ingaan nie.

Ek het vanoggend gestap tot by die watertonnels – dit is so ‘n 3 ure stap uit en tuis. Die kloof is ruig begroei met hoë bome en bosse met redelike digte ondergroei. Die paadjies is egter duidelik en jy hoef nooit jou lyf akkedis te hou nie – wel ‘n keer of wat bobbejaan as die ou bene nie so lekker wil vastrap nie. So met die kloof op het ek by die Boesmangrot verby gegaan asook die een kruinroete wat ek môre sal doen – is ek vanaand bly ek het hulle vanoggend ‘n mis gegee!

Ek is daar by die holkrans verby waar ‘n groot groep vrouens en kinders tydens die Anglo – Boere oorlog gebly het. Dit is nogal ‘n groot grot met ‘n baie groot oppervlak, maar omdat dit ‘n holkrans is, loop die reën / water terug teen die dak af in binnetoe – dit is hoe die holkranse gevorm word. Was seker beskerming teen die ergste weerstoestande, maar moes maar op sy beste ‘n erge ontbering gewees het. Die grot se ingang word redelik toegemaak met groot bosse en bome en hulle sou redelik veilig daar gewees het. As mens darem so stilstaan by so ‘n plek en jou indink in wat die Boere deurgegaan het – veral die vrouens en kinders – tydens die Anglo – Boere oorlog, is dit vrek moeilik om nie te verwens en te veroordeel nie.

Vandaar is ek verder by die rotskoorsteen – ‘n stapel baaaaie groot klippe soos ‘n koorsteen - en die watergat verby. Glo my – ek het hom nie getoets nie, in daai kloof sal die water so koud soos ‘n yskas wees! So ‘n ent aan kom jy by ‘n kettingleer teen die krans op. Skud – skud is ek daar op, tot buite-op die gelykte, en jy kan nie glo jy was ‘n minuut vroeër in ‘n woud binne-in ‘n kloof nie! Oop Vrystaat met die berge en pieke om jou met grasvelde!

Die dorp se dam – nie vreeslik groot nie, is ook daar aan die bokant van die kloof gebou. Mens loop bykans om die hele dam om by sy inloop te kom waar die water oor die eeue heen onderdeur die rotse getonnel het en die mooiste tonele geskep het. Daar is sandbanke en die water is laag – jy klouter daar af en dan kan jy so vir ‘n 200 meter of verder in die tonnels loop en dan verder met die kloof op – heeltyd met holkranse in verskillende stadiums van ontwikkeling om jou. Weer daar uit teen die kant – daar is plekke vir jou voete in die klip uitgekap – tot bo, en dan al die pad terug. Met die pad terug saam, sien mens egter weer so baie mooi goed uit ‘n totaal ander hoek, dat dit net lekker bly.

My se voete was op van die klouter en vastrap toe ek terugkom en ek was omtrent warm! Dog toe ek sal bietjie in die swembad klim vir afkoel, maar ek was onmiddelik afgekoel toe ek net my voete in daai swembad druk. Het my 30 minute in die son sit gekos om weer op ‘n normale temperatuur te kom.

Laat vanmiddag is ek hier af Fouriesburg toe – het op die Internet en sulke blaadjies gelees van als wat hier te sien is. Ek ry toe eers by die Toeriste Info kantoor aan – dit moet deel van die stadsraad poste wees, want al die plekkies wat ek gesien het is erg regstellend – eintlik nie regstellend nie, maar ontstellend! Sy het my na die ou klipkerk, gebou in 1898, en blokhuis beduie. Bietjie vaag met die res, maar ek dink nie daar is ooit kennis en sulke dinge oorhandig as ‘n nuwe stadsraad oorneem nie.

Die kerkterrein is gesluit – moet so deur die tralies afneem, die kerkmense hierlangs is moontlik maar half suinig met hul mooi kerk, of hulle weet nie dat dit een van slegs 2 of drie besienswaardighede in die omgewing is nie. Dit is ‘n baie mooi sandsteen gebou met so ‘n kort kasteelagtige toring en toe befomfaai hulle dit deur ‘n spits toring bo-op daai plat fortagtige toring te plak. Op die selfde terrein – ook agter die geslote tralies, is die blokhuis – blykbaar is daar net twee van hulle soort oor in die land. Ook geen wonder – die blokhuis lyk of dit van sink is – moontlik klip binne? Maar hy is klein – lyk soos ‘n groterige buite kleinhuisie. Weet nie hoe die ding gebruik is nie, en hoekom staan dit daar langs die kerk? Moes baie in die selfde tyd gebou gewees het – maar niemand om te vra en defnitief geen bordjies of iets.

In die tyd van die oorlog het Pres Steyn vir ‘n tyd in Fouriesburg gebly en die dorp is toe as die hoofstad van die Vrystaat verklaar terwyl die Engelse Bloemfontein beset het. Fouriesburg was een van die sterkpunte van die Boere tydens die oorlog. (Hoop nie dit is hulle wat daai stoepid blokhuis gebruik het nie!) Die huis waar Pres Steyn gewoon het, kan een van twee wees – niemand is seker nie? Albei baie gewone klein sandsteenhuise en uit daardie tyd. Maar omtrent 80% van die huise en geboue op die dorp is van sandsteen – dit kan so besonders wees indien dit instandgehou word of mooi gemaak word. O ja, die Info kantoor het my ingelig dat die museum anderdag afgebrand het, nou weet niemand iets van vroeër nie.

Ek het sommer so ‘n diep aakligheid in my oor die toestand op ons klein dorpies. In die Wes Kaap gaan dit redelik en in ‘n mindere mate ook in die Oos Kaap (wel, die een wat ek in was, die ander is ook maar treurig), maar al die Vrystaat dorpies sovêr is baie terug op die brug. Die Regering se patetiese beleid tov plaaslike regering is baie duidelik op die klein dorpies te sien, waar die mense wat aan bewind kom geen idee het van hoe om ‘n dorp met sy infrastruktuur te run nie. En net sodra die groep ‘n idee kry van hoe om dit te run, dan is daar weer ‘n verkiesing en die volgende klomp onkundiges word ingestem. Geen tot baie min instandhouding in en om die dorpe, onversorgde openbare geriewe en areas, winkels wat of toe staan, of wat verval het tot plastiese emmers en drie komberse – meestal ook bedryf deur ‘n Sjinees of Arabier. Daar is egter tekens in al die dorpe dat die mense begin besef dat hulle sal moet betrokke raak – niks gaan regkom as almal op hulle agterente sit en wag dat alles inmekaar tuimel nie. Maar dit gaan stadig – vir baie lank was ons gewoond daar is ‘n relatiewe kapabele organisasie en regering gewees wat dinge bedryf het vir ons – ons het nie direk bemoeid gewees nie.

Genoeg van swartgallig – of liewer, genoeg van realisties wees, ek gaan môre of Clarens of Ficksburg se rigting bekyk – sal môre besluit. Gaan nou sommer glad nie môre die Boesmangrot bekyk nie – het genoeg van hulle vanmiddag gesien!

12 en 13 Sep 06 – GROOT KAROO en OOS VRYSTAAT

Weg net so voor die koue en bewolkheid – kyk, genoeg van wolke en reën is ook genoeg. Ja, ek is gisteroggend – die 12 de, daar uit Graaff Reinet uit. Met die ry-slag het die wolke en mis laag gehang en het daar so ‘n geniepsige windjie gestoot. Sommer in die eerste pas al het dit begin reën en ek baie vêr gery – tot net duskant Middelburg, voor die mis begin lig het. Hoor juis vandag oor die radio hulle het gisternag mooi reënt gehad op Graaff Reinet.

Die aarde hier deur die Groot Karoo is mooi – ek is nou nie juis ‘n kenner op Karoo veld nie, maar tot ek kan sien dat daar baie weiding is en orals blom daai geharde bossies. Die wêreld hierlangs is nie so mals met hul kleurespel as meer suid na die Klein Karoo nie, maar ook mooi met die blou wasige berge altyd in die agtergrond. Dit is meer oop hierlangs met sulke klip rante en kort harde bome in die klofies. Maar, oral is water! Elke holtetjie en dammetjie is tot oorlopenstoe vol – die bome op die kante staan almal so half vieserig met hul pote in die water – dink nie hul is dit baie gewoond nie!

Uitgeklim daar by Loodsbergpas om ‘n paar fotos te neem – mens, maar waai daar ‘n ou noordpoolwindjie! Ek het toe maar bietjie aangedruk om ontbyt êrens te nuttig – het juis so deur Middelburg gery, maar niks gekry, en is toe vort Steynsburg toe. Ek moet sê – die Transvaalse Middelburg is defnitief beter as die Kaapse ene! Sommer net nog ‘n dorpie – seker OK om te bly, maar niks lekker om deur te ry nie.

Steynburg is nie onnodig groot nie. Daar is een moterhawe wat motors verkoop – daar is net een vrt om te verkoop in die vertoonlokaal – moet ‘n voor 196o lorrie wees – jok nie, kyk die foto! Stop toe by die enigste plek wat ontbyt gee – Africa Café of so iets. Is so iets van als – hulle verkoop ‘n paar blikkies koeldrank, sigarette, tweedehandse boeke (Readers Digest Condensed), ‘n paar tuisnywerheid koeke, sulke hang goed van glas en vere, ‘n paar leë volstruisdoppe en ystervarkpenne, iemand se tweedehandse prente, ‘n paar hoede en ‘n uil of twee (wonder of hulle op Nieu Betestha was) en of ou klere of nuwe klere van ‘n ou snit. Maar dis skoon en dis netjies – en die beste, die kos is lekker. Die oom het self gaan ontbyt maak en die ketel loop aansit vir koffie. Sommer by die tafel gebly vir gesels en uitvra so met die kos bring. Van dat sy kinders nie daar wil kom kuier - te stil blykbaar, tot dat die laaitie agter die till baie goed is met adverteer – maar wat se kans is hier? Ons het die meriete om te verkoop en Umbilo in Durban toe te trek bespreek – soos hy sê, miskien kom die kinders dan kuier. Ek het nie baie woorde ingekry nie – miskien is die luister beter, ‘n oor is mos half beter as simpel raad.
Verkwik is ek daar oor Burgersdorp waar ek ‘n ou Blokhuis gaan bekyk het – dit troon so oor die dorpie. Daai blokhuise is mos deur die Kakies gebou in die Anglo Boere oorlog so al met die treinspoor langs vir akkomodasie vir hul troepe wat die spoor en die dorpies opgepas het, en ook om as forte vir verdediging te gebruik. Die gebou is nog stewig en redelik opgepas.

Vandaar na Aliwal Noord waar ek wou oorbly vir die aand. Maar Lesotho nagmaal op Sannieshof! Daai plek het gewemel en gekrioel – in die straat, langs die straat, op die sypaadjies, onderdeur die kar – net waar jy kyk! Of hulle het ‘n bitter groot informele nedersetting, want die dorpie self is maar klein, of die hele Lesotho het kom inkopies doen. Het nie gewaag om stil te hou, het net so bly beweeg – was in elk geval geen plek om stil te hou nie. Tensy ek ‘n bier wou koop, ‘n sypaadjie haarkapper wou benut, een of ander hoender in stukke of klere by die Chinashops wou koop. Maar daar is een diep nice ding daar – daai brug noord uit – Vrystaat toe. Ek is toe ook half haastig oor hom en deur die varkvleissoekpadblokkade. Daar het ‘n vleisinspekteur my jare besig gehou – wou nie eintlik soek vir vleis nie, maar het die groot gesels gehad. Van dat hy dink my Skerpioen lorretjie is eintlik net so oulik soos ‘n Pajero of ‘n ding, tot watter paaie ek nou langs gery het. Van op die kaart vir hom wys van die ander padblokkades, tot detail oor die varksiektes en hoelank dit nog gaan aanhou. En ek het nie eers ‘n woord ingekry nie! Maar was ook OK – het in elk geval my gedagtes weggevat van daai miernes wat ek deur is.

Rouxville is Aliwal se boetie. Daar moes iets gewees het – tjalie uitverkoping of iets, wat daai dorpe so volgemaak het. Ek hou toe maar deur en laai so ou Outa op wat hike met ‘n drom olie en ‘n battery. Hy is toe op pad Zastron toe en ek ook. Nee, sê hy op my vraag – die mense het pay gekry, dis hoekom daar so baie is. Nou kyk – ek het geweet die Vrystaat is ‘n end agter, maar die 12de pay kry? ‘n Dinsdag? Maar laat ek nie die logika van diè wêreld bevraagteken nie. Die olie en battery, verduidelik hy, het hy gekoop op Aliwal waar hy vir sy sussie se seun se troue was en toe bietjie aangebly het vir ‘n kuier. Dis baie goedkoper as op Zastron – diep goedkoper.

Laat middag sleep ek toe Zastron (nogal verbasend stil) in en vind die bordjies wat my beduie na die Eeufees kampterrein, so twee kilometer die kloof in op ‘n grondpaadjie. Half verlate – maar daar kom ‘n man aangestap van die opsigterhuis af – hy is die man met die boekie. Kry kleingeld en ‘n sleutel ook, en toe is die terrein myne. Ek dink nie daar kom eintlik iemand met ‘n karavaan soontoe nie – maar die dam is oorvol en die berge mooi. Jy voel nie onnnodig deel van die gejaagde wêreld as jy daar voor jou karavaan sit en jou koningrykie so bekyk nie. Met die draai deur die dorp het ek gehoor ek kan by die Take Away op die hoek iets kry, maar daar is nie ‘n restaurant nie, net die hotel, en hulle gee etes. Onthou julle, my ouma het ook gepraat van – ‘’hulle gee etes’’.

Vanoggend vroeg het ek die karavaan gehak en die pad gevat Wepener toe.

Enigiemand wat daai pad tussen Aliwal Noord en Wepener ry – selfs tot op Ladybrand, dit is baie, baie sleg! Die pad is net gate – baie is met grond opgevul, maar dit is ongelyk en baie is glad nie toegemaak nie. Daar is groepe wat werk aan die pad, maar dit is ‘n lewenslange projek – moontlik ‘n erflating. Ek het 80 en selfs 60 km/h met die karavaan gery – en nie baie het my verbygesteek nie.

Wepener – ishhh! As mens nie iets goeds kan sê nie – moenie iets sê nie. So is ek toe by Ladybrand in. Daai dorp wemel van die Lesotho! En dit is net Brits! Nie Engels soos ons Engels ken nie, maar so warm-patata-in-die-mond tipe. Van waar Gehasie? Maar in elk geval, die waiter ken Afrikaans en die ontbyt was lekker by so kafeetjie langs die Toeriste-info kantoortjie. Ek het brosjures daar by die Info gaan haal, en daar was twee toeriste voor my wat iets van die omgewing wou weet. Hulle het so ‘n vinnige lesing oor die Vrystaat in geheel in 3 sinne gekry – wil gedoen wees. Ek’t gesien, hulle was effens verbysterd, gaan hulle ‘n rukkie vat om al daai plekke op een kaart te kry. Hulle sê mos – as jy niks weet nie, praat baie, verstom almal! Ladybrand bly vir my ‘n mooi dorp met sy baie sandsteen geboue – hulle lyk al beter met die jare.

Van voor Ladybrand af begin die Maloti roete – dit is vrek mooi met daai berge en die sandsteenkranse. Seker een van die mooiste roetes om te ry. Deie omgewing moet nou net inkoop in die poging om toerisme te trek. ‘n Paar ordentlike oorblyplekke, skoon geriewe by pertolstasies, goeie aanwysings en ‘n plek om koffie te koop. Basics! Hierdie ouens kan regtig by die Suid Kaap en die Karoo dorpe gaan leer oor toerisme.

Van daar het ek gas gegee verby Clocolan en Ficksburg na Fouriesburg toe. Ek het my karavaan ingetrek hier op een van die mooiste plekke – en ek het nou al baie mooi plekke gesien. Meiringspoort net buite Fouriesburg. Dit is binne in een van daai sandsteenkrans poorte met groot koeltebome en waterstrome. Ek gaan hier bly tot so Maandagoggend se kant en die hele wêreld terug tot by Clocolan en vorentoe tot by Golden Gate van hier af bery.